NAGA CITY- Sarong pulis na an kumpirmadong gadan mantang irido an anom na iba pa makalihis an nangyaring pananambang sa duwang police mobile kan Provincial Public Safety Company (PPSC) kan Camarines Norte Police Provincial Office (CNPPO) na nangyari sa banwaan nin Labo, Camarines Norte.
Sa entrevista kan Bombo Radyo Naga ki SPO1 Sheralyn Samonte hale sa CNPPO, ala-1 nin mag-uumagahon ngonyan na aldaw, Disyembre 2 kan tambangan kan pigtutubudang mga miyembro kan rebeldeng New People’s Army (NPA) an duwang police mobile na igwang lunad nin haros sampulong mga pulis sa parte kan barangay Daguit sa nasambitang banwaan.
Alas-2 na nin mag-uumagahon suboot kan makaabot sa provincial command an impormasyon sa nangyaring pananambang asin mismong si PS/Supt. Cerillo Trilles, provincial director kan CNPPO an nagresponde sa lugar.
Haros sarong oras suboot an byahe hale sa provincial command pasiring sa banwaan nin Labo.
Sigon ki Samonte, nagkondusir nin internal security operation an nasambitang mga pulis sa banwaan nin Labo asin pabalik na kuta na an mga ini sa provincial command kan pauranan an mga ini nin bala kan mga rebelde.
Pataas na parte an nasambitang lugar kaya prone ini sa mga ambusha asin posibleng magayon man suboot an napwestuhan kan mga rebelde kaya nakubanan an tropa kan gobyerno sa pananambang.
Ini man suboot an primer bes na nagkaigwa nin pananambang sa barangay Daguit.
Sa ngonyan, padagos pa an pigkokondusir na hot pursuit operations kan mga pulis katabang an Philippine Army para lapagon an nagdulag na mga rebelde.
