NAGA CITY- Kinumpirmar kan Provincial Disaster Risk Reduction and Management Office (PDRRMO) Camarines Norte na igwang labi sa 30 mga turista na pasiring kuta na sa Calaguas Island an na-stranded sa banwaan nin Vinzons sa tahaw kan panlalamasa kan bagyong Urduja.
Ini an sinaysay ni Joven Abayon, miyembro kan provincial rescue team kan PDRRMO-Camarines Norte sa entrevista kan Bombo Radyo Naga.
Sigon ki Abayon, igwang nairehistrong 31 mga turista na pasiring kuta na sa nasambitang isla an dae tinugutan na makabyahe huli sa maraot na kamugtakan nin panahon kan nakaaging mga aldaw.
Posibleng dae pa suboot matugutan kan Philippine Coast Guard (PCG) na makabyahe pasiring sa Calaguas Island an mga turista hasta sa dae pa naibababa an nakataas na gale warning sa probinsya.
Mientrastanto, saro man an nairehistrong casualty sa Camarines Norte katakod kan panlalamasa kan bagyong Urduja makalihis na marumpagan kan nagguhong dakulang tipak nin daga an harong kan biktima na si Conchita Nequita, 58-anyos sa barangay Exciban sa banwaan nin Labo.
