NAGA CITY- Kinumpiskar kan mga otoridad an iligal na paputok na piccolo makalihis na maaktuhan na pigpapabakal ini kan sarong lalaki sa Kamundagan Trade Fair na ginigibo sa ciudad nin Naga.
Binisto an nasambitang negosyante na si Hernan Hipolito.
Naaktuhan mismo kan sarong empleyado kan Bombo Radyo Naga an pagpapabakal nin paputok na piccolo ni Hipolito sa mga kaakian sa Kamundagan Trade Fair.
Sa ekslusibong entrevista kan Bombo Radyo Naga ki Nephtali Fabines, Supervisor kan Market Enterprise and Promotions Office (MEPO) Naga, sinaysay kaini na nakatalaan na rauton an nakumpiskar na mga paputok na pagsasadiri ni Hipolito.
Binigyan man kan citation ticket kan Task Force Paputok si Hipolito huli sa pagtitinda kaini nin paputok sa luwas nin designated area sa ciudad nin Naga.
Pigsierto man ni Fabines na nakikipagtabangan na an saindang opisina sa Task Force Paputok katakod kan pangyayari.
Mientrastanto, labi man an pasasalamat ni Fabines sa Bombo Radyo Naga sa pagpapaabot kan nasambitang impormasyon na nagresulta sa pagkakakumpiskar kan mga iligal na paputok.
