NAGA CITY- Pupunan na ngonyan na aldaw an pag-kolektar kan Presidential Electoral Tribunal (PET) sa mga ballot boxes hale sa probinsya nin Camarines Sur.
Ini para sa ikokondusir na recount katakod kan pigsunad na electoral protest ni dating Sen. Bongbong Marcos laban sa nakalaban sa pagka-bise presidente na si Vice President Leni Robredo.
Sa entrevista kan Bombo Radyo Naga ki Alex Marpuri, tagapagtaram kan Commission on Elections (COMELEC) Cam Sur, sinaysay kaining hasta sa Enero 26 an pagkolektar kan PET nin mga ballot boxes hale sa first, second, fourth asin fifth district kan probinsya.
An municipal treasurer asin election officer kan kada banwaan an madara kan mga kahon sa legislative building kan kapitolyo kun saen naghahalat an mga representante kan PET na sinda man an ma-isyu kan acknowledgment receipt.
Mientrastanto, nanindugan man si Marpuri na mayong nangyaring darayaan kan 2016 elections partikularmente na sa mahigot na labanan kan mga kandidato sa pagka-bise presidente.
Kumpyansang sinaysay kan opisyal na 99.99 percent an accuracy kan vote counting machine kun kaya positibo suboot siyang parehong resulta an maluwas sa ikokondusir na recount kun saen si Robredo an matrayumpo.
