NAGA CITY-Napuli sa shootout an sarong anti-illegal drug operations sa Barangay Cararayan, Naga City.
Sa entrevista kan Bombo Radyo Naga ki SPO2 Toby Bongon, tagapagtaram kan Naga City Police Office (NCPO), napag-araman na nagkondusir nin buy bust operation an mga pulis laban sa suspek na si Maria Catherine Lanuso alyas “Bambie.”
Aagad, mantang nakikipagtransaksyon, narisa suboot kan suspek na police asset an saiyang kahampang kun kaya tulos ining nagdulag gamit an saiyang kotse dara an P8,000 na buy bust money.
Tulos man na nag-aksyon an blocking force kan PNP alagad imbes na mag-untok, pinaputukan pa suboot ni Lanuso an mga otoridad kaya napiritan nang magbalos nin putok an mga operatiba.
Digdi na suboot tinamaan nin bala kan badil an duwang sibilyan na dae na pinangaranan pa kan pulisya na ngonyan nagpaparahay pa.
Sa ginibong follow-up operation kan mga pulis, nadakop subagong hapon si Lanuso na nakatalaan na sangatan nin suruon suon na kaso.
