NAGA CITY- Tinawan nin pagbisto kan lokal na gobyerno kan Baao, Camarines Sur an pigmimirar na ‘Barefoot runner of Bicol’ siring man an labi sa 30 atleta hale sa nasambitang banwaan na naglaban sa katatapos pa sanang Palarong Pambansa 2018.
Pigkondusir subagong alas-4 nin hapon an awarding ceremony sa nasambitang banwaan kun saen tinawan digdi nin certificate of recognition an gold medalist na si Lheslie De Lima; an duwang bronze medalist sa kawat na wushu na sinda Ronalyn Casco asin Mark Lincel Icutan siring man an 30 mga atleta na hale sa Baao.
Nag-atendir man sa nasambitang aktibidad an mga coaches kan mga atleta na tinawan man nin certificate of recognition siring man an bilog na pamilya ni Lheslie na dae na naitago pa an saindang pagigin proud sa trayumpo na nakua kaini.
Sulot ni Lheslie asin kan duwa pang mga bronze medalist sa aktibidad an saindang Bicol delegation uniform asin nakasulot man nin sapatos an nabistadong ‘Barefoot runner of Bicol’.
Apwera man sa nasambitang pagbisto, nakaresibe man nin ‘cash incentives’ an tolong mga medalist hale sa lokal na gobyerno.
Napag-araman na gagamiton ni Lheslie an haros P25,000 na naresibeng ‘cash incentives’ sa pagpapakonstruhir kan saindang harong na piglamasa kan bagyo.
Makalihis man an pigkondusir na awarding ceremony, nagkaigwa man nin motorcade an nasambitang mga atleta na naglibot sa manlaen laeng parte kan ikalimang distrito kan Camarines Sur.
