NAGA CITY- Kinumpirmar kan Quezon Police Provincial Office (QPPO) na igwa nin 17 mga barangay sa probinsya an pigsairarom sa election watchlist katakod kan paparaning Barangay asin Sangguniang Kabataan (SK) Elections na gigibuhon sa Mayo 14.
Sa entrevista kan Bombo Radyo Naga ki PC/Insp Marcelito Platino, tagapagtaram kan QPPO, sinaysay kaini na igwa nin sarong barangay an yaon sa irarom kan Category 1; 12 an pigsairarom sa Category 2 mantang igwa man nin apat na mga barangay an yaon sa irarom kan Category 3 huli sa nairehistrong presensya digdi nin mga rebeldeng New People’s Army (NPA).
Basado man sa pigkondusir na final coordinating conference kan PNP kaibanan an mga representante hale sa Philippine Army asin Commission on Election (Comelec), mahigot na piglatag digdi an mga security measures sa manlaen laeng lugar sa probinsya urog na an mga kabale sa election watchlisted areas.
Pigsierto man ni Platino na 100% nang nakaandam an mga kabuhan kan PNP-Quezon para masierto an marhay asin matuninong na pirilian.
