(UPDATE) NAGA CITY- Binawian naman nin buhay an sarong Swiss national na kabale sa mga nairido sa nangyaring karambola nin limang mga bihikulo sa banwaan nin Libmanan, Camarines Sur suodma.
Sa entrevista kan Bombo Radyo Naga ki P/Supt. Errol Garchitorena, hepe kan PNP Libmanan, sinaysay kaini na dae na naisalbar pa an biktimang si Suzanne Peña, agom kan enot nang binawian nin buhay na Swiss national na si Ronnel Peña.
Nagtitinir pa man ngonyan sa ospital asin padagos na pig-oobserbaran kan mga doktor an siyam na bulang umboy na dawa nakalasik pa hale sa saindang bihikulo, himala man ining nakasalbar.
Mientrastanto, nagtitinir na ngonyan sa kostudiya kan PNP Libmanan an driver kan bus na enot nang nagdulag kan mangyari an karambola suodma alagad nagsuko man sana ini sa mga otoridad.
Marurumduman na duwang persona na an enot na napabaretang binawian nin buhay mantang siyam na iba pa kabale an nasambitang umboy an nairido sa karambola kan duwang pampasaherong bus, duwang kotse asin sarong van na nangyari sa barangay Mabini sa nasambitang banwaan.
