NAGA CITY- Haloy nang kaanggutan an pighihiling na motibo ngonyan kan Philippine National Police (PNP) sa nangyaring pananaksak sa sarong lalaki sa banwaan nin Caramoan, Camarines Sur.
Binisto an biktima na si Manny Plamiano, 43-anyos.
Sa entrevista kan Bombo Radyo Naga ki PO1 David Catangui, hale sa PNP Caramoan, sinaysay kaini na papuli na kuta na hale sa sarong baylehan sa barangay Gibgos an biktima kaibanan sinda Ronald Clores, barangay kagawad Romula Valle, 59-anyos asin Arnel Tolero, 27-anyos.
Nagkaigwa suboot nin mainitan na diskusyon an biktima na si Plamiano asin an suspek na si Clores na pareho suboot na burat.
Sigon ki Catangui, nagsapo nin lugad sa saiyang lawas an biktima na nagresulta sa tulos na kagadanan kaini.
Sa ngonyan, nagpapadagos pa an pigkokondusir na operasyon kan mga otoridad para sa marikas na pagkakadakop kan nakadulag na suspetsado.
