NAGA CITY- Pag-aadalan muna ngonyan kan manhamiento kan Naga City Police Office (NCPO) an nagluwas na impormasyong an ciudad nin Naga suboot an nangenot sa igwang pinakahalangkaw na monthly crime rate sa bilog na nasyon.
Sa impormasyong ipinadara ni Naga City Police Office Director PS/Supt. Jonathan Panganiban sa Bombo Radyo Naga, sinaysay kaini na pag-aadalan muna kan saindang opisina asin kan mga kabuhan kan City Investigation and Detective Management Branch (CIDMB) an nasambitang impormasyon.
Nagsayuma muna ngonyan na magtao nin anuman na komento si Panganiban alagad pigsierto kaini na tulos man sindang mapaluwas nin official statement manungod sa isyu oras na maberipikar na ini.
Enot kaini, nagluwas sa datos hale sa Crime Research and Analysis Center ng PNP Directorate for Investigation and Detection Management (DIDM) na igwa nin 273.83 average monthly crime rate poon kan bulan nin Enero hasta Abril sa presenteng taon an ciudad nin Naga na pinakahalangkaw sa bilog na Pilipinas.
