NAGA CITY-Prangkang sinaysay ngonyan kan lado ni Vice President Leni Robredo na dapat magin sarong marhay na modelo sa mga Pilipino urog na sa saiyang mga official events sa ibang nasyon si presidente Rodrigo Duterte.
Ini katakod kan kontrobersiyal na ‘presidential kiss’ o an paghadok kan presidente sa sarong Pinay Overseas Filipino Worker (OFW) sa pagbisita kaini sa South Korea.
Sa entrevista kan Bombo Radyo Naga ki Georgina Hernandez, tagapagtaram kan Bicolanang opisyal, sinaysay kaini na dawa mayo pang pormal na pahayag na pigpapaluwas si Robredo, nagtitinir man suboot an paninindugan kaini na dapat pigrerespeto asin pigtatawan nin importansya an mga kababaihan.
Kinakaipuhan man suboot na mismong si presidente Duterte an mangenot sa paglaban sa ‘misogyny’ o an pagkaanggot sa mga kababaihan.
Tinawan doon pa ni Hernandez, na igwa nin kaibanan na dakulang responsibilidad komo Chief Executive asin elected official kan nasyon si Duterte kaya dapat sana na ipahiling kaini an pagigin marhay na modelo urog na sa mga opisyal na pagtiripon na pig-aatendiran kaini.
