NAGA CITY- Pigsugo na ngonyan kan Calabarzon-PNP an dugang na pwersa nin kapulisan na mabantay sa ciudad nin Tanauan, Batangas.
Ini katakod sa nangyaring panggagadan ki Mayor Antonio Halili suodma sa mismong flag raising ceremony sa nasambitang ciudad.
Sa entrevista kan Bombo Radyo Naga ki PSupt Chitadel Gaoiran, tagapagtaram kan Police Regional Office 4-A, sinaysay kaining pigsugo na ni Deputy Regional Director for Operations PS/Supt Nolasco Bathan, an chairman kan Special Investigation Task Group (SITG)- Halili, an dugang na pwersa nin kapulisan sa nasambitang lugar.
Sa presente, igwa na suboot 15 augmented personnel hale sa Regional Mobile Force Batallion an pigpadara para masierto an seguridad sa bilog na lugar.
Sa ibong na lado, pighahalat pa man kan SITG an resulta kan otopsiya sa bangkay ni Halili para makua an slug na nagbaon sa lawas kaini asin para maaraman an kalibre nin badil na ginamit sa krimen.
Mientrastanto, dae man hinahale kan mga kapulisan an posibilidad na igwa nin huma sa buhay an alkalde antes pa mangyari an nasambitang pambabadil.
