(UPDATE) NAGA CITY-Nagtatabang na an mga kabuhan kan Philippine Coast Guard (PCG) para mas maparikas an search and retrieval operation sa duwang nawawarang mga aki na lunad kan nagtaolob na motorized banca sa Lake Buhi sa Buhi, Camarines Sur subanggi.
Sa nakuang impormasyon kan Bombo Radyo Naga, napag-araman na nadidipisilan an mga kabuhan kan PCG-Camarines Sur, Philippine National Police asin Buhi Emergency Rescue Team (BERT) sa paghahanap kina Joshua Bejerano, 12-anyos asin Jonas Menorca, 6-anyos na mga biktima huli ta malabo suboot an tubig sa Lake Buhi.
Sa suway na entrevista ki SPO2 Emma Buen, hale sa PNP-Buhi, sinaysay kaini na napasuway an duwang aki sa saindang mga kaparyentes kan maglubog an nilulunadan nindang motorized banca mantang yaon ini sa tahaw kan nasambitang danao.
Sigon ki Buen, hale sa sarong bilar sa Barangay Ipil asin papuli na kuta na sa Barangay San Buena an 12 miyembro kan sarong pamilya kan mangyari an aksidente na nagresulta sa pagkagadan kan tolong persona mantang narescue man an pitong iba pa.
Naghidali suboot na magpuli sa Barangay Ipil an mga biktima huli ta igwa an mga ining babalehan kuta nang dance competition sa saindang barangay fiesta an duwang nawawarang mga aki.
Napag-araman man na yaon sa impluwensya suboot nin arak an kapitan kan baroto kan magbyahe an mga ini.
