NAGA CITY- Gadan an duwang aki mantang 1 nasa ospital makalihis magkakan soboot nin isaw asin barbeque sa Milaor, Camarines Sur.
Sa entrevista kan Bombo Radyo Naga ki Mario Alba, ama kan mga biktima, sinaysay kaining nagkakan sana nin street foods an mga aking sinda Lyka, 10-anyos asin Maryjoy, 13-anyos kun saen dinarhan pa suboot kaini an saro pang tugang na si Jay-R, 14-anyos pag-abot sa harong.
Alagad bigla na sana soboot nagkurulog an tulak kan mga biktima hasta sa nagpuon nang manruluya.
Napag-araman na enot na binawian nin buhay si Lyka asin suminunod naman an 13-anyos niyang tugang.
Mientrastanto nasa ospital na sa ngunyan an saro pang akin na padagos inoobserbaran.
Segun ki Alba, dawa makulog sa saiya an mawaran aki alagad mayo naman ining magiginibo huli dae naman masususog kun saeng tindahan an mga ini nagbakal.
