Nagpapadagos an mga proyekto sa Barangay Abella, Naga City, kaiba na an pagpapatugdok nin covered court na may ikaduwang palapag na magsisirbing evacuation center, solar street lights, asin iba pang pasilidad para sa komunidad.
Sa Intrevista kan Bombo Radyo Naga ki Hon. Apolinario Malana Jr., kapitan kan Barangay Abella, sinabi kaini na an proyekto sa covered court asin evacuation center ay pinopondohan paagi ni Third District Representative Congressman Nelson Legacion.
Huli ta yaon sa low-lying area an barangay asin posible ining maapektaran nin pagbaha, gigibuhon na may ikaduwang palapag an covered court tanganing magamit ini bilang evacuation center sa panahon nin kalamidad.
Nagpoon an konstruksiyon kan proyekto kan Agosto asin target na matapos sa Disyembre kan presenteng taon.
Mientrasanto, kabale man sa mga proyekto kan barangay an pag-instalar nin solar power system. Sa ngunyan, igwa na an barangay nin solar panel na may kapasidad na 12 kilowatts.
Katatapos man sana kan bidding para sa mga solar street lights na ibubugtak sa kada zona. An nasabing proyekto ay nagpoon pa kan nakalihis na taon, alinsunod sa plano kan barangay na mag-instalar nin solar street lights sa kada zona kada taon.
Bukod digdi, nagtao man an lokal na gobyerno kan Naga City nin P1 milyon na Barangay Support Fund. Sa ngunyan, nagpapadagos an bidding para sa pagbakal nin duwang e-trike na gagamiton bilang service vehicle kan barangay.
Mientrasanto, nag-grant man an City Government of Naga nin P1.9 milyon na pondo para sa mga proyekto sa drainage system sa Barangay Abella, na naglalayong makatabang sa pagpauswag kan drainage asin pagdalagan kan tubig sa komunidad.
