Bangkay kan sarong new born baby na nakapatos sa plastic, nadukayang nagpapataw-pataw sa salog sa probinsya nin CamNorte

Nadukayan kan mga residente an mayo ng buhay na lawas kan sarong bagong pangaki na omboy, mantang nagpapataw-pataw sa salog sa Barangay Tugos, Paracale, Camarines Norte.

Sa nagunong impormasyon kan Bombo Radyo Naga, napag-araman na nadukayan na sana kan residente na si Bernie Asis an nagpapataw-pataw na lawas kan omboy sa salog asin nakapatos sa sarong plastic bag.

Tulos man ipinaaram ni Asis sa Barangay Hall an panagyayari asin nakipag-koordinar an mga ini sa PNP Paracale siring man sa Rural Health Unit sa naunambitang banwaan.

Sa presente, nagpapadagos pa an ipigsasagibong imbestigasyon kan mga otoridad tanganing maaraman kun isay an mga magurang kan nakuang omboy na pigtutubudang pig-apon sa lugar.