Nasa kritikal na kondisyon tolo sa labingwalo katawong nalugadan sa nangyaring bunguan kan sarong 10-wheeler truck asin pampasaherong jeep sa boundary ng Libmanan asin Sipocot, Camarines Sur.
Sa entrevista kan Bombo Radyo Naga ki P/Supt. Alejandro Monge, hepe kan PNP-Libmanan, sinaysay kaini na padagos pang pigbubulong sa intensive care unit (ICU) kan Sipocot District Hospital an tolong mga pasahero kan tuminagilid na jeep na pigmamaneho ni Joefel Elevado.
Kinumpirmar man ni Monge na binawian nin buhay an saro sa pasahero na 19-anyos na graduating student na si Julius Quicho kan madatugan suboot kan tuminagilid na jeep.
Mientrastanto, nasa kostudiya kan PNP Sipocot an pahinante kan 10-wheeler truck, mantang hasta ngunyan an dae pa nadadakup an duminulag na driver kan truck na si Alfred Algarme.
Sigon ki Monge, pasiring na sa Camarines Sur an may-ari kan truck na hale pa sa probinsya nin Davao.
Marurumduman na nabudalan kan truck an nakapundong pampasaherong jeep sa Barangay Beguito Viejo sa banwaan nin Libmanan na nagin rason para mawaran nin kontrol sa saiyang behikolo si Elevado antes magtagilid ini.
