Haros maabot sa 200 na mga residente kan mga Barangay sa syudad nin Naga an nagrally sa hampangan kan opisina kan
Department of Social Welfare and Development (DSWD) sa Barangay Calauag, Naga City tanganing ikurahaw an saindang
kahagadan manungod sa dae pa naipapanaong tabang-pinansyal sa mga naapektaran kan bagyong Nina.
Sa nagunong impormasyon kan Bombo Radyo Naga, napag-aramang pasado alas-8 kan magtiripon sa hampangan kan
naunambitang ahensya an mga residente asin myembro kan mga progresibong grupo.
Tuminugot man an mga opisyal kan DSWD na makipagdayologo sa pamayo kan naunambitan na grupo na nalalangkag na
suboot sa pagpapaluwas kan Emergency Shelter Assistance (ESA) na ipigprubesa para sa mga naapektaran kan bagyong Nina na
tuminama sa Bicol kan 2016 o haros duwang taon na an nakakaagi.
Napag-aramang igwa pang anum na Barangay sa syudad nin Naga an dae pa nakakaresibe kan nasambitan na tabang na nahuri
suboot magpasa kan mga dokumentong hinahagad kan DSWD.
Magigirumduman inut nang nagpaliwanag si Mayor John Bongat sa publiko manungod sa naprakasar na ESA funds huli ta
naisabay suboot ini sa pondo na para sa probinsya nin Camarines Sur.
