NAGA CITY- Maabot sa 50 teams hale sa manlaen-laeng parte kan Pilipinas an mapartisipar sa pig-organisar na pinakaenot na ‘Dota kontra Droga’ kan Provincial Government kan Camarines Norte.
Sa entrevista kan Bombo Radyo Naga ki Gino Villafranca, Sports Coordinator asin Provincial Youth Affairs Officer kan probinsya, sinaysay kaini na haros 50 teams hale sa Camarines Norte asin magin sa Metro Manila an mapartisipar sa torneyo na nakatalaang gibuhon sa Disyembre 14-16, 2018 sa Agro Sports Center sa banwaan nin Daet.
An aktibidad sarong paagi suboot para pakusugon pa an kampanya kontra sa iligal na droga asin para mairayo an mga jovenes sa pigpapangalad na bulong.
Apwera sa anti-illegal drugs campaign, pigtutulod man kan gobyerno an responsible gaming para sa mga jovenes na nagkakawat kan inaapod na ‘electronic sports’ (e-sports) kaya maatendir man suboot an representante kan Department of Information and Communications Technology (DICT) para magtao nin mga impormasyon manungod sa nasambitang kawat.
Sa ngonyan, sigon ki Villafranca, igwa ng pigbibilog an provincial government kaibanan an mga computer shop owners para maitulod an responsible gaming sa Camarines Norte.
Mientrastanto, labi man an pagpapasalamat ni Villafranca sa mga jovenes na nagpahiling tulos nin interes asin mapartisipar sa aktibidad.
Napag-araman na apwera sa trophy, maabot man sa P100,000 an ipapanao na papremyo sa torneyo para sa bibistuhong kampeon sa 5v5 asin 1v1 kan Dota 2 Tournament magin sa Cosplay show.
