(UPDATE) NAGA CITY- Ipinasairarom na kan Batangas Police Provincial Office sa forensic investigation an cellphone na narekober hale sa duwang nagadan na suspek sa pagdukot sa sarong negosyante sa probinsya.
Sa ekslusibong entrevista kan Bombo Radyo Naga ki Batangas PPO Provincial Director PS/Supt. Edwin Quilates, sinaysay kaini na padagos an ginigibong mga follow up operations asin imbestigasyon kan kapulisan para mabawi sa kamot kan suboot mga kidnappers an biktima na si Riz John Biscocho.
Naglalaom man an PNP na makakakua nin impormasyon sa narekober na cellphone kan duwang mga kidnappers para makua kun saen kan mga ini pigtatago an biktima.
Enot kaini, napuli sa shootout asin pagkagadan kan duwang pigtutubudang kidnappers makalihis an entrapment operation kan mga kapulisan na nangyari sa banwaan nin Talisay.
Napag-araman na kan Nobyembre 9 kan makaresibe nin report an PNP katakod kan pagkawara kan biktimang si Biscocho na suboot piglunad sa sarong kolor green na Montero asin kan nakaaging aldaw kan makipagkoordinar an mga suspek sa esposa kan biktima asin naghahagad nin P100,000 karibay an libertad kan agom kaini.
