NAGA CITY- Nagpapadagos pa ngonyan an mas hararom na pag-iimbestigar kan Philippine National Police (PNP) katakod kan suboot pagdukot sa sarong babae kan armadong mga kalalakihan sa banwaan nin Bula, Camarines Sur.
Sa entrevista kan Bombo Radyo Naga ki PS/Insp. Reynaldo Balindan, officer in charge kan PNP Bula, sinaysay kaini na blangko pa ngonyan an pulisya sa pagkakabistuhan kan mga suspek na naglalay ki Judy Asaula, 47-anyos siring man an posibleng motibo sa insidente.
Enot kaini, matanga kan Disyembre 12 kan pwersahang naglaog an pigkakarkulong sampulong mga armadong kalalakihan sa pig-aarkilahang harong kan biktima sa Barangay Palsong, kun saen nabadil sa saiyang guramoy si Philbert Asaula kan magpurbar na magdulag mantang nilalay man kan mga suspek an esposa kaining si Judy.
Sigon ki Balindan, nakikipagkoordinar na sinda sa ibang mga law enforcement units para sa marikas na pagkakahanap sa nasambitang babae mantang nasa marhay na kamugtakan na an nairidong si Philbert.
Napag-araman na haros duwang taon pa sana na nag-iistar sa Bula an mag-agom na nagpapabakal nin mga mamahalong tsinelas asin igwa suboot kwartang nagkakantidad nin P70,000 si Judy kan mangyari an insidente huli sa pigpabakal kaining paroy.
Mientrastanto, padagos pang kinukumpirmar kan PNP Bula an sinabi ni Philbert na antes suboot an insidente, igwa ining nahiling na nagkokondusir nin treasure hunting sa lugar.
