(UPDATE) NAGA CITY- Na-trace na ngonyan kan Philippine National Police (PNP) asin kan mga empleyado kan lokal na gobyerno kan Lupi, Camarines Sur an suboot nawawarang P100,000 na kwarta hale sa Municipal Treasurer’s Office.
Sa entrevista kan Bombo Radyo Naga ki PO2 Von Darren Abendanio, tagapagtaram kan PNP Lupi, sinaysay kaini na nag-apod sa saindang hepatura subagong aga an mga empleyado kan LGU-Lupi para ipaabot na nahanap na ninda an enot nang napabaretang nawawarang P100,000 na kantidad nin kwarta.
Sigon ki Abendanio, binanga suboot kan duwang empleyado an kwarta na budget para sa sarong aktibidad kan lokal na gobyerno asin subagong aga sana kan mga ining nadiskobreng dae nawawara an kwarta.
Enot kaini, nagpasiring sa hepatura kan PNP an empleyado kan LGU-Lupi na si Florencia Garcia para ipaabot na nawawara na an kwarta na nakabugtak sa saiyang drawer na enot nang pigtubudang pighabon.
Mientrastanto, nagpagirumdom man an PNP sa mga lokal na gobyerno na magdoble ingat sa pagkakapot kan saindang kwarta urog na ngonyang kapaskuhan para dae na mabiktima nin mga kriminalidad.
