NAGA CITY- Inarestar kan Philippine National Police (PNP) an incumbent kapitan kan Barangay Punta Tarawal, Calabanga, Camarines Sur huli sa kasong adultery.
Sa entrevista kan Bombo Radyo Naga ki PC/Insp. Dino Ben Regazpi, hepe kan Calabanga PNP, sinaysay kaini na pigserbe ninda an warrant of arrest sa harong ni kapitan Ronaldo Coner, 55-anyos sa Barangay Punta Tarawal katakod kan kinakahampang kaining kasong adultery sa MCTC Magarao-Canaman, Camarines Sur.
Tulos man na nakalibre an nasambitang Barangay official makalihis na makabayad nin P8,000 na piyansa.
Dae man maaraman ngonyan ni Regaspi kun ano an nangyari sa likod kan kaso asin kun sisay an nagsangat kaini laban sa nasambitang opisyal huli ta sa banwaan nin Magarao pigsunad an reklamo.
Marurumdumang si Coner an kapitan na nagpasumpa ki Vice President Leni Robredo sa inagurasyon kaini komo ika-14 bise presidente kan nasyon kan Hunyo 2016.
