NAGA CITY- Ikinaogma kan sarong konsehal sa banwaan kan Calabanga, Camarines Sur an pagdakul kan mga nagpartisipar sa pigkundusir na Theoretical Driving Course sa tabang kan Land Transportation Office (LTO)-Naga.
Sa entrevista kan Bombo Radyo Naga ki Adonis Aguilar Jr., Municipal Councilor kan nasambitan ng banwaan, sinaysay kaini na mas nagdugang an numero na saindang piglaoman para sa nasambitan ng seminars.
Sa laog kan tolong aldaw, na nagtapos kasuudma, Pebrero 28, 2025, pigkundusir an aktibidad kun saen, kada aldaw nasa 200 an nagpartisipar.
Sigun ki Aguilar, nasa poco mas o menus 1 million an natipid kan mga taga-Calabanga na dakulang tabang para sa saindang ekonomiya.
Dugang pa kan opisyal, sa huring aldaw man kan aktibidad naglabi pa sa 200 an nagpartisipar huli ta an mga dae pa nakapalista sa pre-registration an nag-arabot pa.
Mientrastanto, saro man sa bagong programa kan LTO an renewal kan non-prof asin professional license na ngunyan sana piggibo sa banwaan.
Obheto man kaini an tanganing malikayan kan mga taga Calabanga na maticketan tuwing igwa nin check point orog na ngunyan na pigpapautob an COMELEC Checkpoint huli sa midterm election.
Sa ibong kaini, piglinaw man kan opisyal na dawa pa igwa na nin student permit license, kaipohan pa man giraray na igwa ini nin kaibahan sa pagmamaneho na may non-prof o professional license.
