NAGA CITY- Pigkokonsederar na trayumpo kan Girls Scout Camarines Sur an pagigin Outstanding kan saindang rating.
Sa entrevista kan Bombo Radyo Naga ki Marybel Dolor Binalla, Council Executive kan Girls Scout Camarines Sur Council, sinaysay kaini na sa bilog na nasyon an Girl Scouts Camarines Sur an dae man nagpapahuri orog na kun an pinag-uurulayan an saindang mga accomplishment asin mga programa para sa mga Girl Scouts.
Sigun ki Binalla, igwa sindang pigtatangro na basic course kun saen an training an gikan sa sainda na kun saen obheto na magtalubo an skills kan mga estudyante.
Apwera digde, obheto pa kan saindang mga programa na mapakarhay an values formation kan mga miyembro kan Girl Scouts asin maipahiling kan mga ini an saindang pigtatagong kakayanan asin talento.
Paliwanag pa kan opisyal, bako sanang camping an saindang pigtatangro kundi kadakol na mga aktibidad na nagtatabang ma-develop an skills and talent kan mga kaakian.
Dugang pa kaini, igwa man sindang pigtatangro sa mga barangay na trainings depende soboot sa mga pangangaipuhan kan lugar.
Mientrastanto, liwat man na pigsaysay ni Binalla na boluntad an pagpaparehistro tanganing magin miyembro kan Girl Scouts depende soboot ini sa kamawotan kan mga magurang.
Sa ngunyan, pigsierto na sana kaini na dagos-dagos an saindang mga programa na makakatabang sa komunidad orog na para sa mga kababaihan.
