NAGA CITY- Padagos an pagkundusir nin Oplan Ligtas Pamayanan kan BFP-Pili orog na ngunyan na namamatean na an labing init kan panahon.
Sa entrevista kan Bombo Radyo Naga ki SINSP Violeta F. Ramirez, an Municipal Fire Marshal kan BFP Pili, sinaysay kaini na sa bilog na taon igwa soboot sindang pigkukundusir na training asin seminar sa Public asin Private Establishments magin sa mga eskwelahan tanganing magin preparado sa anuman na insidente kan kasulo. A
Apwera digde, pigtatabangan man soboot ninda an mga barangay na magibo nin Fire Protection Plan o Community Protection Plan tanganing madertiminar an pig-aapod na Hot Zone o Fire Zone.
Nakapalaog sa nasambitan ng lakdang an pag-training sa mga residentes na magin enot na responder sa panahon kan pangbungkaras nin kasulo o an mga pig-aapod na Community fire auxiliary group.
An mga ini nagsasairarom sa mga regular na drills tanganing magkaigwa nin bastanteng impormasyon na magagamit sa panahon kan emerhensiya.
Mientrastanto, padagos man an pagpapagirumdom kan opisyal sa publiko na likayan an Octopus connection, pirmeng siertuhon na piggagadan an mga kalan asin an pagsierto na malinig an kapalibutan.
Apwera digde, nangapudan man si Ramirez na pirmeng enoton an pagreport sa mga opisina kan BFP antes na mag-live tanganing tolos man na marespondehan an kasulo asin dae na orog pang maglala.
Sa ngunyan, hagad na sana kaini sa publiko na pirmeng magpasiguro sa saindang mga kaharongan tanganing magin salbado sa panahon kan tag-init.
