NAGA CITY- Nagpagirumdom an pamayuhan kan Barangay San Jose, Pili Camarines Sur sa mga pedicab asin tricyle driver na magin patas sa pagsisingil nin pamasahe.
Sa entrevista kan Bombo Radyo Naga ki Lorradel Alamo, Kapitan kan nasambitan ng lugar, sinaysay kaini na kan nakalihis na mga aldaw igwang kinaulay na driver dapit sa pagsisingil nin halangkaw na pamasahe sa saiyang pasahero.
An pasahero na ini an nagpa-abot nin reklamo sa Presidente kan TODA na kinababalihan kan nasambitan ng driver. Tolos man na pig-aksyunan an problema tanganing dae na magdakula pa asin magkawsa nin kariribukan.
Katakod digde, liwat na nagpagirumdom an mga namamayo sa TODA sa saindang lugar sa mga pedicab asin tricycle driver na magsunod sa mga regulasyon siringman magin patas sa pagsisingil.
Likayan soboot na magin abusado huli ta an siisay man na magbalgar sa panundon an igwang kakahampangon na penalidad.
Sa ngunyan, pig-enkaminar na sana kan opisyal an publiko na tolos na ipaabot sa saindang opisina o sa mga TODA President enkaso mabiktima kan mga mapang-abusong mga driver.
