NAGA CITY- Piglalaoman na an orog pang pagdagsa kan mga deboto ni Amang Hinulid sa banwaan nin Gainza kasabay sa obserbasyon kan Holy Week .
Sa entrevista kan Bombo Radyo Naga ki Delia Bermudo, sarong deboto, sinaysay kaini na ngunyan na Huwebes Santo hasta Biyernes Santo, ribong mga tawo an nagpapasiring sa banwaan nin Gainza tanganing bisitahon an Imahe ni Amang Hinulid.
Sigun ki Bermudo, taon-taon tuyong Semana Santa, tradisyon na kan mga deboto na masilayan an Imahe kan Amang Hinulid kun saen pigdadayo pa digde an pig-aapod na pahalik o paghadok sa bitis kan Puon.
Komo sarong deboto, dakula soboot an saiyang paglaom sa Amang Hinulid, tuyong Semana Santa bitbit kaini an dakulang pagpapasalamat para sa gabos na biyaya na saindang pigtatamasa sa presente.
Katakod digde, ikinaogma man ni Bermudo na mayo nang ipinagbabawal sa presente kaipuhan sana an pagsunod sa mga panundunan na piglatag kan namamayo sa Amang Hinulid tanganing malikayan an anuman na mga insidente.
Igwa man soboot nakabantay na Barangay Tanod asin kapulisan tanganing mag-asegurar kan kasalbaduhan kan mga deboto asin magmantinir kan paz y orden.
Sa ngunyan, piglalaoman pa an padagos na pagbulos kan mga deboto na gikan pa sa manlaen-laen na probinsiya sa Rehiyong Bicol.
