Namundo an bilog na kinaban sa pagkagadan ni Pope Francis na iyong namayo nin haros 12 taon sa Simbahang Katolika.
Marurumduman, binawian nin buhay an Santo Papa, aldaw nin Lunes sa saiyang residensiya sa Santa Marta haros sarong bulan makalihis na makaluwas sa ospital huli sa double pneumonia.
Sigun sa death certificate, stroke asin heart failure an ikinagadan kan 88-anyos na pontiff.
Makalihis man an sarong aldaw kan saiyang ginibong pagbati sa mga tawo kan Easter celebration sa St Peter’s Square sa Vatican, liwat giraray nagtiripon an mga ini sa kaparegas na lugar tanganing ipahiling an saindang pakikidumamay sa pagkagadan kan Santo Papa.
Kadakol an mga luhang nagbulos komo tanda kan saindang pamamaaram sa Santo Papa na pinadangat kan mga Katoliko sa bilog na kinaban.
Katakod kaini, nagpa-abot naman nin pakikidumamay an mga lideres gikan sa manlaen-laen na lugar sa bilog na kinaban siring ninda Donald Trump, Vladimir Putin asin iba pa.
An lawas ni Pope Francis an ibubugtak sa kabaong na gibo sa kahoy asin zinc sa Santa Marta chapel antes na ibalyo sa St Peter’s Basilica para sa gigubuhong bilar.
An funeral an kaipuhan na magibo sa pag-ultanan kan apat hasta anom na aldaw antes na ilubong an Santo Papa sa basilica kan Santa Maria Maggiore sa Rome.
Mientrastanto, an pang ara-aldaw man na gibuhon sa Vatican City state an gigubuhon ni Farrell komo Camerlengo, sarong senior cardinal.
Alagad sentro man kan pag-urulay kun isay an maribay ki Pope Francis na iyong maserbeng lider kan nasa 1.4 billion Katoliko.
Kasaby man kan pagkadan ni Pope Francis, an kampana kan Notre-Dame cathedral sa Paris, France an pinatanog nin nasa 88 beses na nagsisimbolo sa mga taon kan nagin buhay kan Santo Papa kabali na an saiyang pagbisita sa Mosul, in Iraq kan 2021.
Sa Gaza man na padagos an giyera, an kagadanan ni Pope Francis garo ilaw na nawaran nin laad asin liwat na natapos nin kadikloman an lugar.
