Nagpadara an European Union (EU) nin haros 200 observers para sa nararani na halalan sa Mayo 12.
Sigun sa EU Election Observation Mission na pinangenutan ni chief observer Marta Temido, an saindang mandato an tangani i-assess an proseso kan halalan sa Pilipinas asin man kun nagtatalima ini sa konstitusyon kan nasyon asin man sa international standards.
Naenot ng ipinadara an kabilugang 72 observers mantang nakatalaan man na mag abot sa Pilipinas an dugang na labing 100 observers sa masunod na mga semana.
Tinawan duon man ni Temido na dae sana sinda yaon sa nasyon tangani siyasaton an mga resulta kan halalan o tangani na magin legal an proseso, kundi tangani obserbaran asin i-assess kun iginagalang o dae an international standards, Konstitusyon kan Pilipinas asin man mga ley kaini.
Nakatalaan man na iluwas kan EU observers an saindang assessment sa mga masunod na bulan kun saen mabalangkas sinda nin mga suhestiyon kun pano mapaparahay pa an paagi kan pagdaraos kan halalan sa Pilipinas.
Sigun man ki Deputy Chief Observer Manuel Sanchez De Nogues, sainda man na ia-assess an mga kandidato sa halalan, voter registration asin ia-analisa man an mga reklamong pigsunad kan Commission on Elections asin resolutions.
An ipapadarang observers kan EU an saro sa pinakadakulang numero na ipinadara sa Pilipinas magpuon kan obserbasyon kan nakalihis na taong 2000.
