Ikinabigla ni House Committee on Overseas Workers Affairs Chairman Jude Acidre an nagin pahayag ni Vice President Sara Duterte na kumpiyansa ining maaabsuwelto sa isasagibong impeachment trial kan Senado katakod kan mga paggastos sa confidential fund asin iba pang alegasyon.
Sigun ki Acidre nagtitinir na bigo si VP Duterte na maipaliwanag kun pano kaini ginastos an saiyang confidential fund kaiba na an P125 milyon na naubos sa laog sana kan 11 aldaw kan taong 2022.
Sinabi ni Acidre, an sarong Assistant Majority Leader sa Kamara, na mayo lamang laog an mga pigsasaysay ni Duterte orog na an sinasabi na mayong kasalanan, nin huli ta padagos pa man kaining nililikayan na simbagon an mga alegasyong nakabugtak sa Articles of Impeachment na pigsunad kan Kamara de Representantes.
Pigtawan duon ni Acidre na an padagos na paggamit ni Duterte kan malabong depensa siring na sana kan “national security” an orog sana na nagpapararom kan hinala kan publiko na linigon an saiyang pangalan.
Binatikos man ni Acidre an mga naenot na pahayag ni Duterte na haros pigsawarang saysay an gabat kan mga akusasyon kontra sa saiya.
Sigun ki Acidre, posibleng masyado pang amay an kumpiyansa ni Duterte sa saiyang kapalaran sa Senado, orog na ta magabat an mga akusasyon kontra sa saiya.
Pigtutukdo man ni Acidre na mantang may karapatan si Duterte na idipensar an sadiri, nasa saiya pa man giraray an responsibilidad na pahimutikan an mga detalyadong nadiskubre sa pagdangog kan House Committee on Good Government.
Pig inkaminar man ni Acidre an Bise Presidente na iuntok na an pagsasawsaw sa isyu kan saiyang pagigin taga-Mindanao o babae, nin huli ta taliwas ini sa tunay na kahaputan na kaipuhan na masimbagan.
Tinawan duon ni Acidre an tungkulin kan Kamara na ipa utob an Konstitusyon asin man siertuhon na an gabos nin opisyal anuman an ranggo ay may paninimbagan sa saindang ginigibo.
