Aram baya nindo mga ka-Bombo, sarong lalaki na gikan sa UK an pighatulan kan suspended prison sentence makalihis na akuon na tinuyo kaining suluon an saiyang harong nin haros duwang beses sa laog sana kan sarong bangi tanganing mahiling kaini an pig-iidolo na mga bombero.
Binisto an lalaki na si James Brown, 26-anyos gikan sa Northumberland, UK.
Susog sa report si Brown an igwang kakaibang obsession sa mga firefighters kumparar sa mismong kalayo.
Mawot soboot kaya kaini na magin bombero, alagad dae nautob an saiyang pangiturugan huli sa manlaen-laen na mga kinahampang kaining problema.
Sa enot, kuntento na an nasambitan ng lalaki sa pagmasid sa mga bombero gikan sa harayo asin pag-aapod alagad kan dae na ini nakuntento saiyang tinuyong suluon an harong tanganing mahiling sana an saiyang mga pig-iidolo.
Basado man sa record kan korte, pigkuanan nin video ni Brown an mga bombero mantang an mga ini an nag-aapula kan kasulo.
Naoogma pa soboot ini mantang nahihiling an mga firefighters na naglalapigot na maisalbar an saiyang pagsasadiring harong.
Mientrastanto, antes man an insidente, napag-araman na an lalaki an igwa nang record sa korte na nagpapahiling na pig-apudan kaini an fire department nin nasa 80 beses sa laog kan 12 bulan.
Sa ngunyan, padagos na pig-aadalan kan korte kun ano an mas tamang kapadusahan na kakahampangon kan nasambitan ng lalaki.
