Nagwalat nin mga pagiromdom sa mga kapulisan si Philippine National Police (PNP) Chief PGen. Rommel Francisco Marbil na mantiniron an kaayusan asin kasalbaduhan kan publiko sa aldaw kan eleksiyon asin magtinir man neutral sa aldaw na ini tanganing magin tutok an mga ini sa saindang tungkulin.
Ini an alinsunod pa man sa nagin pangapodan ni Presidente Ferdinand Marcos Jr. na gibuhon na malinig asin marhay an eleksiyon ngunyan na taon.
Dugang pa ni Marbil, duwa sana an primerong misyon kan PNP kada magkakaigwa nin eleksiyon asin enot na digde an siertuhon na salbado an mga botante asin an publiko, asin an panduwa man an pagmamantinir kan neutralidad kan saindang kabuhan tanganing malikayan an pagigin imbwelto an mga ini sa mga iwal pulitika.
Dugang pa kan hepe, yaon soboot an mga kapulisan tanganing pagsirbihan an taong bayan bakong magsirbe o pagsirbihan an interes kan politika.
An mga nagin pahayag na ini kan hepe an kasunod kan mga political activities sa bilog na nasyon kasabay kan nagdadakulang pahgadit kan publiko mapadapit sa pagkakaigwa soboot nin pigkikilingan an nagkapira sa saindang kabuhan.
Pigtawan-duon pa ni Marbil na an sisay man na pulis na ma-iimbwelto sa partisan political o magkakaigwa nin mga partisipasyong politikal, tulos na kakasuhan kan mga administrative cases asin pwede man na mahali sa serbisyo.
Sa huri pigtawan-duon man kan hepe an mga gampanon kan PNP para sa eleksiyon, iyo an pagsierto na an mga Pilipino an makakaboto nin malaya asin dae nakakamateng takot.
Mientrastanto, pig-enkaminar man ni Marbil an mga commanders asin regional directos na bantayan nin marhay an saindang personahes asin tulos na ipagtaong aram an mga indikasyon na pwedeng pangingiaram kan mga ini sa ulayang politikal.
Pigsierto man ni Marbil sa publiko na matinir an saindang kabuhan na maninindugan para sa pagtatanggol kan demokrasoa na nakatuon sa paghahatod nin matoninong, marhay asin tapat na eleksiyon.
