Nagpakol sa 329 tauhan kan Philippine Army an minobilisa komo parte kan contingency asin standby force sa National Capital Region (NCR) katakod kan halalan ngunyan na Lunes, Mayo 12.
Sigun ki Philippine Army Spokesman Lt. Col. Louie Dema-ala, an contingency force ay pigbibilog kan tropa kan Civil Disturbance Management (CDM), k9 Explosive Ordnance Disposal (EOD), Medical and Chemical, Biological, Radiological and Nuclear (CBRN) teams.
Nasa 31 assets man siring kan mga military trucks asin ambulances an naka-standby. Isinairarom man sa blue alert an Philippine Army Emergency Response Companies (ERCs) magpuon Mayo 11-14, 2025 tangani magsimbag sa ano man na emergency sa panahon nin eleksiyon.
Enot nang nagdeploy an Philippine Army Major Units nin nasa 23,591 personnel tangani gumanap kan election duties sa bilog na nasyon mantang nasa 21, 509 an pigbugtak sa standby alert magpuon pa kan nakalihis na Mayo 9.
