NAGA CITY- Piglalaoman na maabot na sa huring semana kan bulan nin Mayo an banhi na hybrid rice gikan sa Department of Agriculture.
Sa nagin paghampang sa mga kagawad kan media ni Ernesto Asence III, Acting City Agriculturist, sinaysay kaini na itatao an nasambitan ng banhi sa Clustered Association kan Rice farmers sa barangay Pacol asin sa gabos na paraoma na mawot magtanom kaini.
Sigun sa opisyal medyo delayed ngunyan an pag-abot kan nasambitan ng banhi alagad pigsierto man na tolos na itatao sa mga paraoma enkaso yaon na.
Katakod digde, an paborableng panahon para sa hybrid rice an mainit an panahon kun kaya kaipuhan na hilingon an forecast kan state weather agency tanganing magin matrayumpo an pagtatanom.
Mientrastanto, padagos man na pigbubusol sa siyudad nin Naga an inaapod na Urban Agriculture Program kun saen pigtutukdo digde an dapit sa inaapod na container gardening.
Paliwanag ni Asence huli ta igwang mga barangay an sadit na an espasyo maresulta man ini sa pagkabawas kan mga lugar para sa production kun kaya kaipuhan an praktikal na solusyon sa problema.
Huli kaini, kada bulan nagkakaigwa nin free trainings dapit sa production kan natural fertilizer asin pesticide, container gardening asin iba pang klase kan pagtatanom tanganing matawan nin magkakanigong kaaraman an publiko dapit digde.
Sa ngunyan, magayon soboot an dalagan kan mga programa sa agricultural sector sa siyudad nin Naga asin naglalaom sinda na magpapadagos-dagos ini hasta sa mga masunod pang mga aldaw o taon.
