NAGA CITY – Matao nin reward an lokal na gobierno kan banwaan nin Pili, Camarines Sur para sa makakapagtukdo sa mga suspek sa naggadan sa kapitan kan Barangay San Juan sa nasambitan ng banwaan.
Marurumduman, binisto an biktima na si Nerio Braza, barangay Kapitan kan naumbitan ng Barangay na nagsapo nin tama kan badil sa manlaen-laen na parte kan saiyang lawas na nagresulta sa saiyang tolos na kagadanan.
Sa entrevista kan Bombo Radyo Naga ki Tom Bongalonta Jr., Alkalde kan LGU Pili, sinaysay kaini na nag-ulay sinda kan Finance committee kun saen igwa nin available na pondo para sa reward na mapakol sa P100,000, kan makakapagtukdo sa mga suspek sa naggadan sa nasambitan ng kapitan.
Sigun ki Bongalonta, padagos pa na pig-aaraman an motibo sa krimen.
Mientrastanto, padagos an saindang pangapodan sa publiko na kun isay man an may posibleng pagkakabistohan sa nasa likod kan krimen, tulos ining ipaaram sa mga otoridad orog na ta an saindang banwaan an pigkokonsiderar na sarong peaceful municipality sa Bicol Region.
