Natawan nin pagbisto kan Department of the Interior and Local Government (DILG) Region V an banwaan nin Pili Camsur bilang saro sa mga Regional Awardees huli sa outstanding performance asin episyenteng implementasyon kan mga programa kan gobyerno.
Sigon ki Mayor Marivic Solano, an alkalde kan banwaan nin Pili Camsur, an onrang ini nakua bako sanang para sa alkalde kundi para sa gabos na saiyang mga kahimanwa.
Labi man an pagpapasalamat kan alkalde sa Department of the Interior and Local Government (DILG) Region V. huli sa pagreyalisar kan paghingu-a kan presenteng administrasyon na orog pang mapakaray an saindang municipalidad.
Kabale sa mga pagbistong naguno kan banwaan an Outstanding LGU in Enabling Inclusive Communities, siring man an apat na pagbisto para sa Child-Friendly Governance, 2026 Peace and Order Council Audit, LCAT-VAWC Assessment, asin Local Council for the Protection of Children Assessment.
Dagdag pa kan alkalde, an mga pagbistong ini resulta kan kolektibong espwersos, dedikasyon, asin pagkasararo kan mga staff, partner agencies, mga barangay, asin orog sa gabos, kan gabos na constituentes kan banwaan.
Padagos man na itutulod kan opisyal an sarong gobyernong may pagmalasakit, inklusibo, matoninong, asin komitido sa karahayan kan lambang Pileño.
An mga pagmidbid na ini iyo an maserbing inspirasyon tanganing orog pang mapakarhay an mga serbisyo asin programa para sa padagos na pag-uswag kan Pili Camarines Sur.
