Nangapudan an Kapitan kan Barangay kan Caroyroyan, Pili, Camarines Sur sa gobyerno na tawan nin atensyon an kamugtakan kan mga paraoma asin residente kan mga pagtaraid na barangay arog kan Kadlan, San Jose, San Agustin, asin Sagurong na suboot apektado kan Uptown Pili Project.
Sa intrevista kan Bombo Radyo Naga kay Jerry Canave (Barangay Captain, Caroyroyan, Pili, Camarines Sur), sinabi kaini na dakul na mga oma an nawalat na dae natatanom makalihis na mapundo an pag-oma huli sa implementasyon kan proyekto, rason na mawaran nin kabuhayan an nagkapirang paraoma.
Bilang dating Provincial Federation President kan Irrigators Association, sinabi ni Canabe na importanteng maseguro an proteksyon kan kabuhayan kan mga paraoma na maaapektaran kan mga development projects. Dae man suboot dapat pabayaan an karahayan kan mga residente na direktang apektado mantang pigtutulod an pag-uswag.
Tinawang-duon man kan kapitan na kulang an konsultasyon sa mga barangay bago nagpoon an proyekto. Sinabi niya na nagpoon na an konstruksyon antes pa nagkaigwa nin supisyenteng dayalogo sa mga komunidad, kun kaya dakul na mga residente asin mga opisyales kan barangay an dai natawan nin malinaw na impormasyon manungod sa katuyuhan, benepisyo, asin posibleng epekto kan Uptown Pili Project.
Dugang pa ni Canabe, basado sa saiyang aram, kadaklan sa mga apektadong paraoma dae man nagkokontra sa proyekto kun tatawan sinda nin makatanosan na bayad sa saindang mga daga asin magkakanigong relokasyon. Alagad, nagdadanay suboot na dakulang isyu an puturo kan mga pamilyang nawaran nin kabuhayan, urog na itong haros duwang taon nang dae nakakapag-oma.
Sa katapustapusi, nangapudan si Canabe sa gobyerno nasyonal asin iba pang nanonongdan na ahensya na siguraduhon na balanse an implementasyon kan mga development projects. Importante suboot na mag-uswag an mga komunidad, alagad kaipuhan man na maseguro na protektado an karahayan, kabuhayan, asin puturo kan mga tawong direktang apektado kan siring na mga proyekto.
