Pig-inkaminar kan sarong election lawyer si Presidente Ferdinand Marcos Jr. na i-veto an propwestong ley na nagpapauktaba sa Barangay asin man Sangguniang Kabataan elections (BSKE) na nakatalaan na ikundusir sa Disyembre 1 presenteng taon.
Pighurot ni Atty. Romulo Macalintal na dapat likayan kan Presidente na mautro an pagkakasala kaidto na kun saen idineklarang unconstitutional kan Korte Suprema an Republic Act No. 11935 na pigporbarang ipagpauktaba an BSKE kan nakalihis na Disyembre 2022.
Bagaman inistilo soboot an reconciled bill komo ley sa pagtatakda kan termino kan panunungkulan kan mga opisyal kan barangay, malinaw na misleading an propestong ley na an tunay na epekto an tangani ipagpauktaba an local election sa Disyembre asin man ilipat sa primerong Lunes kan bulan nin Nobyembre sa masunod na taon, na mapalawig pa pagsirbi kan mga nakatukaw na opisyal nin mayong public mandate.
Sigun ki Atty. Macalintal, an reconciled bill kan Senado asin man Kamara an nagbabalgar sa constitutional rule na dapat sarong subject sana an malinaw na nakabugtak sa title kan sarong legislative measure.
Sa reconciled bill, sakkop kaini an tulong magkakasuhay na urulay, enot iyo an pagtalaan nin bagong termino kan panunungkulan kan BSKE officials gikan sa tulong termino, ngunyan gigubuhon nang apat na termino, ikaduwa iyo man an pagpapauktaba kan halalan sa Disyembre 2025 asin ikatulo, an pag-otorisa sa pagpapalawig pa kan panahon nin pagtitinir sa pwesto kan mga presenteng barangay asin SK officials.
Marurumduman, niratipikaran kan parehong kapulungan kan Kongreso kan nakalihis na Miyerkules an bicameral conference committee report na nagtatalaan sa apat na taong termino gikan sa presenteng tulong taon para sa BSKE officials.
Pinaghalo sa bicam report an Senate Bill No. 2816 asin House Bill No. 11287 na nag-amyenda man sa Local Government Code of 1991 partikular na digde an termino asin petsa kan pagkundusir kan masunod na BSKE.
Ipapadara man ini sa Presidente para sa saiyang pagpirma. Enkaso na pirmahan kan punong ehekutibo komo ley, mauurong an BSKE sa primerong Lunes pa kan Nobiyembre 2026.
