Pig-anunsyar ni United States President Donald Trump na matrayumpo nindang naikasar an saindang pag-atake sa mga nuclear sites sa Iran partikularmente na sa mismong nuclear program kan nasambitan ng nasyon sa Fordow.
Sa saiyang nagin social media post, pigkompirmar ni Trump na apwera sa saindang pag-bomba sa mga nuclear sites sa Fordow, Natanz asin Esfahan, pabweltada na man sa Estados Unidos an saindang mga lunadang panghimpapawid na ginamit sa pagbombo sa mga nasambitan ng sites.
Sigun sa mga report, anom na bunker buster bombos an ginamit tanganing ma-bomba an Fordow mantang 30 Tomahawk missiles man an ginamit sa duwa pang mga nuclear sites na pinasabog kan US.
Makalihis an ikinasar na operasyon, pigkompirmar mismo kan White House na nagkaigwa paramientras nin pag-ulay sa tahaw ni Trump asin ni Israeli Prime Minister Benjamin Netanyahu para sa full coordination kaini.
Mientrastanto, sa parte pa kan pahayag ni Trump, pig-enkaminar kaini an Iran na magtugot nang tapuson an nagtitinding problema sa tahaw kan saindang nasyon asin magin kan Israel.
Piglalaoman man ngunyan kan gobyerno kan US na mapundo na an tensiyon sa tahaw kan duwang mga nasyon asin mataong dalan ini sa katoninongan.
