Nagsunad nin reklamo an labi sa 86 na biktima nin pang-aabuso kan nagkapirang online lending applications (OLAs), sigun sa report kan Presidential Anti-Organized Crime Commission (PAOCC).
Susog sa pahayag kan PAOCC, alas-6 nin pagkaaga pa sana, nag abot na sa saindang opisina an mga biktimang nakaeksperyensya nin pagbabanta, o pananakot gikan sa mga online lending applications tangani magsumiter kan saindang sinumpaang salaysay.
Pigtawan duon kan PAOCC na an mga ilegal na paagi na ginagamit kan mga OLAs, kabali na an public shaming, doxing, coercive messaging, asin pagbabanta, an malinaw na pagbalgar sa data privacy, lending regulations, asin human dignity.
Nakisumaro man an United OLA Victims Movement (UOVM) sa sabayang pagsusunad kan reklamo.
An UOVM an sarong civil society organization na pinamamayuhan ni Kikay Bautista, na nagtatabang asin nagtataong giya sa mga biktima kan online lending harassment.
Sigun ki Usec. Gilberto Cruz, an pagdagsa kan mga bagong reklamo an malinaw na tanda na mas kadakol na Pilipino an nagdedesison nang ipagpauktaba an saindang mga karapatan asin man labanan an pang-aabuso.
Sa presente, igwa sindang poco mas o menos 150 pormal na reklamo, asin piglalaoman nindang madakol pa ini mantang nagdadakol an mga biktima na nagsusuplong.
