Pigsierto kan Cybercrime Investigation and Coordinating Center (CICC) na igwa ining mga kagamitan tanganing ma-detect an mga ‘pekeng videos’ na naglakop sa online.
Sigun ki Deputy Executive Director Atty. Renato ”Aboy” Paraiso kan CICC, sainda ining pigbabantayan sa tabang na man kan piglunsar na Threat Monitoring Center na iyong nagamit kan nakalihis na eleksiyon.
Kaya makakasierto soboot an publiko na saindang dae piggigilid an mga humang posibleng darahon kan mga ini orog na an mga deepfake videos o Artificial Intelligence online generated content.
Huli digde idinugang pa kaini na an pagigin imbwelto o pasimuno sa paglakop kan mga siring na klase kan content, an maikokonsiderar na pagbalgar kan ley.
Kaya igwang kaakibat na padusa enkaso maaraman asin madiskubre kan CICC an pagigin kaparte kan sarong indibidwal sa ilegal na gibuhon o aktibidad.
Marurumduman na kasuarin sana, igwang panibagong ‘deepfake’ video an naglakop sa social media platforms gamit an imahe mismo ni President Ferdinand ‘Bongbong’ Marcos Jr.
Kaya an CICC, tulos na naggibo nin pagsusuri asin idinulok sa mga social media platforms tanganing mahali nin marekas na mas maglakop pa an nasambitan ng pekeng video kan Presidente.
Abiso ninda na maglikay asin magin mapanuri orog na sa mga nahihiling, nadadangog asin nadadalan na mga content sa online.
