NAGA CITY- Pigsaysay kan civil defense agency sa Gaza, na an panibagong Israeli air strikes asin riribayan nin putok kan badil an rason sa pagkagadan kan nasa 23 katawo kabali na an duwang kaakian.
Sigun ki Civil defense spokesman Mahmud Bassal, saindang pig-transpor an nasa na lawas kabali na an mga kaakian asin kababaihan na binawian nin buhay sa manlaen-laen na lokasyon sa Gaza Strip.
Katakod kaini, dae naman nagtao nin komento an Israel alagad pigsaysay na an insidente an huli sa saindang paglalapigot na paluyahon an kapasidad kan Hamas sa pakikipaglaban na nagpuon pa kan October 2023 attack sa Israel.
Sigun sa mga saksi sa pangyayari, nakadangog soboot sinda nin makusog na pagsabog sa kataid na harong.
Kan magluwas, digde na nahiling an naraot na kaharongan asin igwang nagbungkaras na kasulo.
Pigsaysay kan mga residente na pigbomba soboot an harong nin missile maski mayong patanid o warning.
Apwera digde, saro man drone strike an nagtama sa kinamumugtakan kan mga nagdulag na residentes harani sa southern city kan Khan Yunis na ikinagadan kan limang katawo kabali na an mga kaakian.
Sa ngunyan, padagos na naglalangkaw an numero kan mga binawian nin buhay sa Gaza huli kariribukan sa lugar.
