Naglangkaw na sa 111 katawo an komo kan nagadan makalihis tumama an magnitude 7.4 na lindol sa kanlurang parte kan Colombia kaining Lunes.
pumalo man sa 87 iba pa an irido, mantang padagos an rescue operation sa mga tawong posibleng na-trap sa irarom kan mga nagabang gusali sa manlain lain na syudad.
Sa datos kan U.S. Geological Survey may rarom na 107 kilometro an lindol harani sa San Jose del Palmar, probinsya kan Chocó.
Makusog na namatian an pag urog pati sa pirang darakulang syudad sa bilog na nasyon.
Ini an enot na dakulang krisis na aatubangon kan bagong administrasyon ni Colombia President Abelardo De La Espriella, pirang aldaw sana makalihis ining manampa sa puwesto.
Huli digdi, idineklara na ni De La Espriella an national state of emergency asin sinabi na naka preparar an bilog na pamahalaan tanganing masagibo an rescue operations asin maghatod nin tabang sa mga apektadong komunidad.
Suboot, prayoridad kan saiyang administrasyon an maisalbar an mga taong na-trap sa irarom kan mga bumagsak na istruktura.
Naging mas sensitibo man an sitwasyon huli sariwa pa sa rehiyon an epekto kan makukusog na lindol na tumama sa katain na nasyon sa Venezuela kan Hunyo.
