Nahihilingan kan Department of Agriculture (DA) nin sinyales nin paglago an sektor nin pag-ooma sa Pilipinas kasunod kan mga serye nin kalamidad, krisis, asin mga outbreak kan helang sa mga hayop.
Sigun ki Agriculture Secretary Francisco Tiu Laurel Jr., nagpuouon nang magbunga an mga intervention asin repormang ginigibo kan gobyerno komo kasimbagan sa epekto kan mga nasambitan ng problema.
Nasa tamang direksyon an sektor kan pag-ooma sa nasyon; halimbawa digde iyo an mga record-high na volume kan mga naaaning produkto gikan sa manlaen-laeng industriya.
Pigsasaro-saro kan sekretaryo an labi na nagpasakit sa sektor nin pag-ooma kaining nakalihis na taon siring kan huruhalabang tag-tuyot, magkakasunod na supertyphoon, volcanic activity, magin man an liwat na paglobo kan kaso kan African swine fever.
An mga ini an nagin pasakit sa haros gabos nin rehiyon sa bilog na Pilipinas, asin nagkawsa nin pagbaba kan lokal na supply kan pagkakan.
Siringpaman, sa paagi kan government intervention, naglalago na an sektor kan pag-ooma kun saen ngunyan na taon, nilalaomang makaka-ani na an nasyon nin labi sa 20.46 million metric ton nin paroy, an pinakahalangkaw na produksyon sa historya kan nasyon.
Nilalaoman man na makakapag-ani an Pilipinas nin pinakahalangkaw na sugar output ngunyan na taon, mantang sa corn industry, nairehistro na an paglago nin hasta sa 2.2 percent.
Kampante an agriculture secretary na kun mapadagos sana an mga reporma asin intervention na ginigibo kan presentng administrasyon, madagos-dagos nang makabangon an sektor kan pag-ooma.
