NAGA CITY- Pigsaysay kan sarong opisyal kan DepEd-Camarines Sur na welcoming development para sa saindang lado an entry level na P50-K na sweldo kan mga paratukdo sa pampublikong eskwelahan.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd-Camarines Sur, sinaysay kaini na nasa proseso pa kan deliberasyon kan kongreso kun mangyayari o maipapautob an nasambitan ng prosopwesto.
Sigun pa ki Pelingon, dakulang katabangan sa mga paratukdo enkaso maglangkaw an sweldo orog na ta kadakol sa presente an nagpapasiring na sa ibang bansa asin duman naghahanap nin mas dakulang sweldo.
Dugang pa kan opisyal, sa paglangkaw kan sweldo madugang man an mga benipisyo na marereseber kan mga paratukdo.
Mientrastanto, enkaso man na maipautob tolos man ining ibababa asin kun igwa nang pondo na an tolos man na iimplementar.
Alagad sa presente, hihilingon pa ini asin padagos na tututukan kan DepEd huli ta Kongreso pa an bola.
Sa ngunyan, kamawotan na sana kan opisyal na magkaigwa nin katotoohan asin mangyari an nasambitan ng proposal.
