Pig-anunsyar kan administrasyon ni U.S. President Donald Trump an pagbabawas kan puwersang militar sa Los Angeles, kun saen 2,000 National Guard an saindang papaulion.
An lakdang an parte kan pag-atras kan operasyon makalihis an matinding batikos asin protesta kontra sa mahewasang immigration raids kan federal government.
Marurumdumang enot na ipinadara an mga National Guard kan nakalihis na Hunyo tanganing sugpuon an mga hiro-protesta kontra sa operasyon kan ICE (Immigration and Customs Enforcement), na nagsasagibo nin mass arrest sa mga pampublikong lugar.
Nag-abot sa 4,000 National Guard asin 700 an ipinadara sa siyudad, maski tutol digde sinda Mayor Karen Bass kan Los Angeles asin Gobernador Gavin Newsom kan California.
Sigun sa Pentagon, nagbaba na an kariribokan kaya tinugotan na ninda an 2,000 tropa na magbweltada.
Siring man, matinir pa man an natatadang 2,000 National Guard asin 700 marines sa siyudad.
Tinuligsa man kan mga lokal na opisyal asin residente an nagtitinir na presensiya kan militar na sinaysay na nagdadara nin takot asin tensiyon sa mga komunidad kan mga immigrants.
Kan nakalihis na Domingo, ipigsugo kan sarong federal judge na untukon na an mga mayong habas na pag-arestar sa pitong county sa California, kaibahan an Los Angeles.
