Pighagad kan kampo ni dating Presidente Rodrigo Duterte sa International Criminal Court (ICC) Pre-Trial Chamber na mag-convene para sa urgent status conference antes an Hulyo 25.
Ini an tanganing mapag-ulqtan an mga dae pa nareresobarang ulayan antes an nakatalaang confirmation hearing sa pig-aakusarang crimes against humanity sa dating Presidente sa Setyembre 23.
Sa isinapublikong request kan defense team, sinaysay kan kampo ni dating Presidente na nagkapirang mga isyu an nagtitinir na nakabinbin asin kaipuhan na masimbagan.
Pigtukoy man kan defense team na apat na isyu na pinagtutubodang dae pa nareresolbaran kan Pre-Trial Chamber I, siring man an mga dokumentos o iteam na dae pa ninda kapot imbes pig-redact sa pigsumiter na dokumentos.
Kaibahan na digde an kahagadan kan kampo ka dating Presidente para sa saiyang interim release, diskwalipikasyon kan 2 hukom huli sa soboot saindang pagigin bias sa isyu kan hurisdiksiyon, asin an paghamon sa otoridad kan ICC tanganing pairalon an hurisdiksiyon kaini sa kaso kan dating Presidente makalihid magkalas an Pilipinas sa Rome Statute.
Sigun sa defense, makakatabang an status conference tanganing matukoy an pinaka-episyenteng paagi tanganing magpadagos sa nagkapirang ulayan na na-redact o dae pigbali gikan sa dokumento.
Katakod kaini, pighagad kan defense sa international court na isagibo an conference antes mag-alas-5:30 nin hapon, oras sa Netherlands sa Hulyo 25 antes an nakatalaang summer recess kan tribunal.Nakatalaang mag-resume kaya an ICC sa Agosto 19.
