Ipinahayag ni Atty. Neri Colmenares, saro sa mga abogado kan prosekusyon sa kaso kontra ki dating Presidente Rodrigo Duterte, na padagos an saindang pagpreparar para sa maabot na pormal na pagdangog sa Nobyembre 30 sa International Criminal Court (ICC).
Segun ki Colmenares, sa presente dakul pang isyu asin nakabinbing mosyon an saindang pighahalat na desisyunan kan korte bago magpuon an pagdangog.
Kaiba sa mga pangenot na pinagdedebatehan ngunyan an pagpapahiling asin pag-iingat sa pagkakakilanlan kan haros 70 testigo na pinreparar kan saindang lado.
Naghagad na sinda nin protective order sa korte tanganing masiguro an kaligtasan kan mga testigo, kaiba an paggamit nin sound distortion, pagtago kan saindang mga pangaran, asin paglikay sa pagpapahiling kan saindang mga lalawgon sa publiko.
Mantang, par daa maparikas an paglilitis o streamlined trial, gusto kan prosekusyon na gamiton na sana an mga nakasurat na sinumpaang salaysay o written affidavits kan mga testigong na-interbyu na, tanganing dumiretso na tulos sa cross-examination imbes na uliton pa an halabang direktang paghapot.
Minsan siring, pinuna ni Colmenares an lado kan depensa huli ta garo daa ini sumasalungat sa mga lakdang na makakaparikas kuta sa takbo kan paglilitis.
Marurumdoman na nahahampang si Duterte sa kasong Crimes Against Humanity na may koneksyon sa saiyang kampanya kontra-droga kan siya pa an nagtutukaw bilang Presidente kan nasyon.
