NAGA CITY- Pigkanselar an biyahe sa mga palupadan asin kadagatan sa ibang lugar sa Bicol Region huli sa huma kan Bagyong Crising asin Habagat.
Sigun sa Civil Aviation Authority of the Philippines (CAAP) Bicol, anom na biyahe an pigkanselar sa palupadan kan Naga City, Masbate City sa probinsiya kan Masbate asin Virac Airport sa Catanduanes huli sa maraot na kamugtakan kan panahon.
Pigsaysay pa ka CAAP na nasa 516 na pasahero an naapektaran nin suspension kan mga biyahe gikan sa Masbate pasiring Clark Airport, Naga City pasiring Manila, Virac pasiring sa Manila asin balikan.
Apwera digde, pigsuspender man kan Philippine Coast Guard an biyahe sa mga kadagatan sa probinsiya kan Sorsogon huli sa piglalaoman na darakulang hukol huli sa bagyo.
Sa sarong advisory, pigsaysay kan PCG na an gabos na biyahe kan mga vessels asin watercraft na igwang gabat na three gross tonnes o mas hababa pa an suspendido.
Siringman an mga darakulang lunadang pandagat an pigpapa-alerto huli sa posibilidad kan masungit na kadagatan.
Sa ngunyan, padagos na pig-eenkaminar an publiko na mag-andam sa epekto na dara kan Bagyong Crising.
